Það er eitthvað svo hátíðlegt við að gera heimatilbúinn ís fyrir jólin. Berglind Hreiðars hjá Gotterí og gersemar hefur gert ófáa slíka í gegnum tíðina og finnst alltaf jafn gaman að bera ísinn fram eins og ísköku sem skorin er í sneiðar. Hér er hafrakexbotn sem smellpassar með karamellunni og góða ísnum úr smiðju Berglindar sem steinliggur um hátíðirnar.
Ómótstæðilega gott að njóta ístertu eins og þessarar um hátíðirnar.
Ljósmynd/Berglind Hreiðars
Ískaka með karamellu og pekanhnetum
Fyrir 10-12
Hafrakexbotn
- 250 g hafrakex
- 100 g brætt smjör
Aðferð:
- Setjið bökunarpappír í botninn á um 20-22 cm smelluformi.
- Brytjið kexið gróft niður í blandara og myljið niður í honum þar til sandáferð er komin á kexið.
- Setjið kexmylsnuna í skál, hellið smjörinu yfir og blandið saman.
- Hellið í kökuformið, þjappið niður í botninn og upp um það bil hálfar hliðar, setjið í frysti á meðan þið útbúið karamelluna og fyllinguna.
Karamella með pekanhnetum
- 120 g smjör
- 80 g púðursykur
- 2 msk. síróp
- 1 tsk. vanilludropar
- ¼ tsk. salt
- 80 g pekanhnetur (saxaðar)
Aðferð:
- Bræðið smjörið við meðalhita í potti og bætið þá púðursykri og sýrópi saman við.
- Náið suðunni upp og lækkið síðan aftur í meðalhita, leyfið aðeins að bubbla og hrærið í allan tímann þar til sykurinn er uppleystur.
- Takið þá af hellunni, bætið vanilludropum, salti og pekanhnetum saman við og leyfið blöndunni að ná stofuhita áður en þið blandið henni saman við ísinn í næsta skrefi.
Fylling og samsetning
- 400 ml rjómi frá Gott í matinn
- 5 egg aðskilin
- 60 g púðursykur
- 40 g sykur
- 2 tsk. vanillusykur
- 40 g karamellukurl
- 20 g pekanhnetur
Aðferð:
- Þeytið rjómann og stífþeytið eggjahvíturnar og geymið til hliðar.
- Þeytið síðan saman eggjarauður, báðar tegundir af sykri og vanillusykur þar til blandan þykkist og verður ljós á litinn.
- Vefjið næst rjómanum varlega saman við með sleikju og þar á eftir stífþeyttu eggjahvítunum.
- Hellið ísblöndunni síðan í formið, ofan á kexbotninn í nokkrum skömmtum. Setjið smá, síðan smá karamellu óreglulega hér og þar og endurtakið þar til bæði ísblanda og karamella er búin.
- Sléttið aðeins úr toppnum og stráið karamellukurli og pekanhnetum yfir toppinn.
- Frystið í að minnsta kosti 4 klukkustundir eða yfir nótt og losið þá úr smelluforminu og skerið í sneiðar.
- Berið fram á hátíðlegan hátt og njótið.