Matur | mbl | 21.10.2018 | 11:02

Syndsamlega gott sunnudagslamb með geggjuðu meðlæti

Er sunnudagshefðin lambalæri og kartöflur á gamla vísu eða er landinn dottinn úr hefðinni? Sama hvort það er hefð eður ei, við erum alltaf til í safaríkt lambalæri sem þetta með grænmeti, kartöflum og nóg af hvítlauk.

Sunnudagslamb með grænmetisgotti

Lambalæri
10 hvítlauksrif
16 rósmaríngreinar
½ rauður chili
20 litlar kartöflur
1 salat laukur
2 stórar gulrætur
½ fennika
Flögusalt
Pipar
Ólífuolía

Aðferð:

Leggið lambalærið í stórt eldfast fat eða djúpa ofnskúffu klætt bökunarpappír.
Skerið rákir í kjötið, nægilega djúpar til að koma hvítlauk, rósmarín og chili þar fyrir.
Skerið hvítlauksrifin til helminga og chili í skífur. Stingið hvítlauk, rósmarín og chili ofan í rákirnar á kjötinu. Geymið samt eitthvað til að leggja við hlið kjötsins.
Hitið ofninn í 200°.
Hreinsið kartöflurnar, skerið laukinn í báta og gulræturnar í þykk strá. Skerið fenniku í litla munnbita. Dreifið nú kartöflum, lauk, gulrótum, fenniku, hvítlauk, rósmarín og chili í kringum kjötið.
Saltið og piprið kjöt og grænmeti og hellið ólífuolíu yfir allt saman.
Eldið í 1½ tíma eða þar til kjötið er tilbúið.
Leyfið kjötinu aðeins að standa áður en það er borið fram.