Svipaður kraftur hefur verið í eldgosinu við Sundhnúkagíga í nótt og í gærkvöldi og gýs jafnt og þétt. Enn virðist gjósa úr sömu þremur gígum og í gærkvöldi og er nyrsti gígurinn stærstur. Hraunstraumur virðist hafa haldið áfram í vesturátt, sunnan við Hagafell, við námuna sem þar er.
Þetta segir Salóme Jórunn Bernharðsdóttir, náttúruvársérfræðingur hjá Veðurstofu Íslands, spurð út í stöðuna á eldgosinu.
Hvað gasmengun varðar þá hafa nokkuð há gildi mælst í Bláa lóninu en þau fara lækkandi. Engir gestir eru í lóninu. Gildin náðu 6.000 míkrógrömmum á rúmmetra, sem eru óholl gildi, auk þess sem mengun mældist í Höfnum í nótt en lækkaði fljótt aftur.
Samkvæmt gasdreifingarspá verður suðvestanátt í dag og beinist mengun í átt að Bláa lóninu, Höfnum og Suðurnesjum. Snýst í norðvestan- og vestanátt í kvöld.