Áætlað er að um 1,4 milljörðum verði varið í áætlun stjórnvalda í málefnum íslenskrar tungu. Um er að ræða málefni margra ráðuneyta, sem unnið er undir forystu menningar- og viðskiptaráðherra, með það að markmiði að efla íslenska tungu í samfélaginu. 

Katrín Jak­obs­dótt­ir for­sæt­is­ráðherra, Lilja Al­freðsdótt­ir, menn­ing­ar- og viðskiptaráðherra  og Guðmund­ur Ingi Guðbrands­son, fé­lags- og vinnu­markaðsráðherra, kynntu í dag þingsályktunartillögu, um aðgerðaráætlun í málefnum íslenskrar tungu 2023-2026.

Í þingsályktunartillögunni er fjallað um mikilvægi stuðnings við íslenska tungu í stjórnarsáttmála. Um er að ræða afrakstur ráðherranefndar sem sett var á laggirnar að tillögu forsætisráðherra, sem hefur það hlutverk að efla samstarf milli ráðuneyta um málefni íslenskrar tungu og tryggja samhæfingu þar sem málefni skarast. 

Frétt af mbl.is

Stjórnvöld í vörn og sókn fyrir íslenskuna

Tímamóta aðgerðaráætlun

Lilja segir áætlað að verja um 1,4 milljörðum í aðgerðaráætlun verkefnisins. Það sé þó ljóst að einstaka atriði þurfi að fjármagna betur, segir hún, og nefnir sem dæmi Samevrópska tungumálarammann, sem er í farvegi og verður settur inn í næstu fjármálaáætlun. 

„Þetta er algjör tímamóta aðgerðaráætlun til að styðja við bæði vörn og sókn tungumálsins,“ segir Lilja og leggur áherslu á að málefnið varði allt samfélagið. Sem dæmi leggja stjórnvöld ríka áherslu á viðhorfsbreytingar, til að mynda með skilaboðum um að íslenskan skuli í hávegum höfð. 

Hluti ráðherranefndarinnar kynnti þingsályktunartillögu um aðgerðaráætlun í málefnum íslenskrar tungu 2023-2026. mbl.is/Kristinn Magnússon

Ríkari skyldur lagðar á innflytjendur um að læra tungumálið

Að sögn Lilju verða ríkari skyldur lagðar á innflytjendur um að læra tungumálið, enda gríðarlega mikilvægt að ná árangri á því sviði. 

„Til þess að tungumálið lifi, þá þurfum við að hafa eitt málsamfélag.“

Til að ná tilsettum árangri verður aðgengi að íslenskunámi stóraukið, segir Lilja og bendir á að ekki sé hægt að setja ákveðnar skyldur eða kröfur, þegar námsframboð er ekki nægilega gott. 

Gríðarlegur áhugi úr atvinnulífinu

Eitt af markmiðum ráðherranefndarinnar er að stuðla að auknum sýni- og heyranleika íslensku í almannarými, í breiðri samvinnu atvinnulífs og stjórnvalda. 

„Ég vil hrósa atvinnulífinu. Atvinnulífið hefur sýnt gríðarlegan áhuga á að stuðla að því að íslenskan sé ávallt fyrsta tungumálið,“ segir Lilja sem hefur til að mynda átt í mjög farsælu samstarfi við samtök aðila í ferðaþjónustu. Þau hafa verið mjög öflug við að hvetja sitt starfsfólk til að sækja námskeið í íslensku, segir Lilja, „einmitt til að lyfta tungumálinu.“

Tengdar fréttir

Íslenska

Íslenskufærni myndi hraða fjölskyldusameiningum

• Dapurlegur vitnisburður um áhugaleysi ríkisstjórnarinnar
• Íslendingar eftirbátar Eista
• Vilja stofna gervigreindarmiðstöð Íslands
• Íslenska notuð sem vopn í útlendingaandúð

» Fleiri tengdar fréttir

• Blogga um frétt