„Þetta gat ekki verið betra“

„Þetta gat ekki verið mikið betra, þó ég segi sjálfur frá. Frábær lög og frábær flutningur í alla staði, mikil og góð stemning í húsinu,“ segir Geirmundur Valtýsson tónlistarmaður en tvennir tónleikar voru haldnir í Eldborgarsal Hörpu sl. laugardag honum til heiðurs. Geirmundur verður senn 80 ára, eða þann 13. apríl næstkomandi.

Söngvarar á tónleikunum voru Sigríður Beinteinsdóttir, Helga Möller, Ari Jónsson, Grétar Örvarsson, Óskar Pétursson, Elísabet Ormslev og Sverrir Bergmann Magnússon. Þau fluttu úrval laga Geirmundar sem hann ásamt Magnúsi Kjartanssyni valdi en Magnús stjórnaði hljómsveitinni. Kynnir var Þorgeir Ástvaldsson.

24 lög valin af 170

Lagavalið var ekki einfalt en flutt voru 24 af um 170 lögum sem Geirmundur hefur gefið út á plötum á sínum langa tónlistarferli. Hann lék á sínum fyrsta dansleik aðeins 14 ára, í félagsheimilinu Melsgili í Skagafirði árið 1958. Hann starfrækti lengi eigin hljómsveit og varla er til það félagsheimili eða tónleikasalur landinu þar sem Geirmundur hefur ekki spilað.

„Ég er mjög sáttur við hvaða lög voru valin,“ segir Geirmundur, sem kom fram í lok tónleikanna og flutti sitt vinsælasta lag, Nú er ég léttur, með söngvurum og hljómsveit.

„Það var virkilega gaman að sjá og hitta allt þetta fólk. Þarna voru ekki bara Skagfirðingar heldur fólk af öllu landinu og margir sem komu til mín rifjuðu upp dansleikina með mér og hljómsveitinni.“

Geirmundur segist í fyrstu hafa verið efins, er tónleikahaldarar í Dægurflugunni komu að máli við hann í vetur, um að svona tónleikar fengju næga aðsókn. Það reyndust óþarfa áhyggjur, miðasala hófst á fimmtudegi og 600 miðar voru farnir á sunnudegi. Á endanum varð nær uppselt á báða tónleika, með vel á þriðja þúsund gesti.

Til skoðunar er að halda svipaða tónleika í Hofi á Akureyri í haust en það hefur ekki verið ákveðið, að sögn Geirmundar.