Leikari sakaður um heimilisofbeldi fannst látinn

Bandaríski leikarinn Cole Brings Plenty fannst látinn eftir að hafa verið sakaður um heimilisofbeldi. 

Plenty var 27 ára gamall og lék í þáttunum 1923 sem eru svokallaðir „spinoff“ þættir af þáttunum Yellowstone. 

Fjölskylda hans greindi frá því að hans væri saknað eftir fund með umboðsmanni sínum fyrr í vikunni. 

BBC greinir frá því að lögregla hafi síðar fundið hann látinn í bíl í Kansas-ríki í gær. Málið er nú í rannsókn. 

Yfirgaf vettvang

Á þriðjudag nafngreindi lögregla Plenty í tengslum við rannsókn á heimilisofbeldi. Árásarmaðurinn hafði flúið vettvang áður en lögregla mætti. 

Plenty sást síðar á umferðarmyndavélum yfirgefa Kansas-borg. 

Frændi hans, leikarinn Moses Brings Plenty, greindi frá andláti Cole Plenty á Instagram. Yfirlýsing frá föður Cole fylgdi. 

„Það hryggir mig að tilkynna að sonur minn, Cole, fannst látinn og er ekki lengur meðal vor.“

• Blogga um frétt