Pippa Middleton og James Matthews eru nú orðin hjón eftir stjörnuprýdda athöfn í breskri sveitakirkju fyrr í dag. Middleton, sem er 33 ára, giftist hinum 41 árs gamla Matthews í kjól hönnuðum af breska hönnuðinum Giles Deacon.

Middleton öðlaðist heimsfrægð þegar hún gegndi stöðu brúðarmeyjar í brúðkaupi systur sinnar, Katrínar, hertogaynju af Cambridge, og Vilhjálms Bretaprins árið 2011.

Vilhjálmur mætti til athafnarinnar ásamt bróður sínum Harry í morgun. Hvergi mátti sjá kærustu Harry, bandarísku leikkonuna Meghan Markle, en samkvæmt frétt The Telegraph mætir hún í veisluna.

Bræðurnir Vilhjálmur og Harry á leið í athöfnina. AFP

Á meðan Vilhjálmur gekk í kirkjuna með Harry hafði Katrín í nógu að snúast með börn þeirra, hina tveggja ára gömlu Karlottu og tæplega 4 ára gamla Georg, en Karlotta var brúðarmey og Georg hringaberi í athöfninni. Frænka prinsanna, Beatrice prinsessa, mætti einnig ásamt tennisleikaranum Roger Federer, en Middleton á að vera mikil áhugakona um tennis.

Katrín með börnunum sem fóru með hlutverk í athöfninni. Georg og Karlotta eru fremst. AFP

Brúðurin mætti til kirkjunnar ásamt föður sínum Michael í Jaguar-blæjubíl og var fagnað af um 100 manns sem höfðu safnast saman fyrir utan kirkjuna.

Í ljósi fjölda konungborinna í kirkjunni var mikið öryggiseftirlit og var lokað fyrir flugumferð á svæðinu sem og drónaflug. Íbúar í nágrenninu fengu sérstök armbönd til þess að vera auðkenndir frá gestum og voru beðnir um að hafa með sér skilríki öllum stundum í dag.

Veislan fer fram á heimili Middleton-hjónanna og þar er búið að reisa stærðarinnar garðhús úr gleri sem kostaði víst 100.000 pund eða því sem nemur 13 milljónum króna.

Middleton er miðjubarn, ári yngri en Katrín en fjórum árum eldri en bróðir þeirra James. Hún útskrifaðist úr háskólanum í Edinborg með gráðu í enskum bókmenntum. Hún hefur gefið út tvær bækur, eina með leiðbeiningum um veisluhöld og aðra með uppskriftum.

Pippa kemur til athafnarinnar ásamt föður sínum. AFP

Georg prins. AFP

Tengdar fréttir

Kóngafólk í fjölmiðlum

Kóngurinn ríkari en mamma sín

• Fyrsta málverkið af Karli konungi afhjúpað
• „Við erum mjög hamingjusöm“
• Karl Gústaf leiðbeinir Friðriki
• Hefur engan tíma til að hitta Harry

» Fleiri tengdar fréttir

Pippa Middleton

Pippa á von á sínu öðru barni

• Aldís var í brúðkaupi Pippu og James
• Settleg í Alexander McQueen
• Allt um brúðarkjólinn hennar Pippu
• Flottir hattar í brúðkaupi ársins

» Fleiri tengdar fréttir

• Blogga um frétt