Víða fiskast vel

Það fiskast þokkalega víðsvegar um land þessa dagana og kom Ljósafell SU-70 til hafnar á Fáskrúðsfirði um miðnætti með fullfermi, alls 105 tonn.

Fram kemur í færslu áhafnarinnar á Facebook að 44 tonn hafi verið þorskur, 27 tonn ufsi, 22 tonn ýsa og 8 tonn gullkarfi.

Ljósafellið heldur til veiða á ný klukkan eitt á morgun.

Einnig ágætur afli fyrir vestan

Einnig virðist hafa verið fín veiði hjá áhöfninni á Rifsnesi SH-44 sem landaði tæplega 60 tonnum á Rifi í dag, að því er segir á Facebook-síðu Hafna Snæfellsbæjar.

Á Rifi lönduðu nokkrir í gær og kom Bárður SH-81 til löndunar með rúm 23 tonn, en Bárður hefur verið á netaveiðum á Breiðafirði að undanförnu og hefur landað yfir 20 tonnum á hverjum degi frá miðvikudegi í síðustu viku. Bárður landaði tæplega 22 tonnum á laugardag og rúmlega 28 tonnum á föstudag.

Í gær kom einnig Stakkhamar SH-220 til löndunar og var báturinn með 18,5 tonna afla. Esjar SH-75 landaði 15,3 tonnum, Kári III SH-219 landaði 6.672 kílóum og Jóa II SH-275 landaði 1.535 kílóum.

• Blogga um frétt