Landssamband smábátaeigenda hefur óskað eftir fundi með Katrínu Jakobsdóttur forsætisráðherra til þess að ræða við ráðherrann um þá ákvörðun Svandísar Svavarsdóttur matvælaráðherra um að auka ekki aflaheimildir smábáta í strandveiðikerfinu um 4.000 tonn í þorski.

„Þessi ósk kemur í beinu framhaldi af ákvörðun matvælaráðherra um að hafna því að auka þorskveiðiheimildir strandveiðiflotans um 4.000 tonn sem hefði komið í veg fyrir veiðibann og stöðvun flotans,“ segir Örn Pálsson framkvæmdastjóri Landssambands smábátaeigenda í samtali við mbl.is.

„Við ætlum að gera henni grein fyrir stöðu mála og afleiðingum ákvörðunar matvælaráðherrans sem og að ræða við hana um mikilvægi strandveiða,“ segir Örn og bendir á að hátt í 1.000 störf víða um land séu undir í þessu máli.

Örn Pálsson, framkvæmdastjóri Landssambands smábátaeigenda. mbl.is/Eggert Jóhannesson

Bæði eigi það við um þá sjómenn sem verða af vinnu og tekjum vegna ákvörðunar matvælaráðherra sem og um afleidd störf, ekki síst í fiskvinnslu og flutningum, en fjölmargir aðilar víða um land, ekki síst í hinum fámennari sjávarbyggðum, hafi misst vinnu sína vegna þessa.

„Á fundinum með Katrínu Jakobsdóttur forsætisráðherra munum við ítreka beiðni okkar og teljum það vera í hennar verkahring sem forystumanns ríkisstjórnarinnar að sjá til þess að orðið verði við þessari beiðni,“ segir Örn.

Svar við ósk smábátamanna um fund með forsætisráðherra hefur ekki borist enn.

Tengdar fréttir

Strandveiðar

Þorskafli strandveiðibáta jókst á öllu landinu

• Veiðileyfum á upphafsdegi strandveiða fjölgaði
• Mokveiði á fyrsta degi strandveiða
• Mikið um að vera í stjórnstöð Landhelgisgæslunnar
• „Síðustu leifar náttúrulegs lífs á Íslandi“

» Fleiri tengdar fréttir

• Blogga um frétt