Töluverð áskorun felst í því að hanna og koma upp öflugri vinnslu á millidekki á togurum, enda eru gerðar miklar kröfur til vinnslugetu og sveigjanleika og er það ekki undantekning á nýjum Baldvini Njálssyni.

„Það var mikið lagt upp úr hönnuninni á þessu millidekki og lögð áhersla á að einfalda allt eins og hægt er og bjóða upp á mikinn sveigjanleika svo hægt sé að vinna ólíkar fisktegundir,“ segir Páll S. Helgason, róbótaverkfræðingur og vélfræðingur hjá Klaka hf.

„Vinnsla um borð í frystitogara er frábrugðin vinnslu í frystihúsi að því leyti að vinnslan í frystitogara þarf að geta unnið allar tegundir, stærðir og gerðir á sama tíma, en frystihús getur ákveðið að vinna til dæmis þorsk fyrir hádegi og ýsu eftir hádegi. Sem sagt einbeitt sér að einni tegund í einu og gert það rosalega vel,“ útskýrir hann.

Er ekki töluvert föndur að koma þessu fyrir?

„Það er eiginlega magnað hverju er hægt að troða í svona skip og hverju er hægt að afkasta. Þetta er mikil vinna og það verður að vinna í mjög nánu samstarfi við áhöfnina. Það er lykilatriði í að ná að standa vel að því að setja upp svona vinnslu að áhöfnin komi að hönnuninni og komi með sína sýn, því það eru þeir sem standa við þessi tæki og vita hvar flöskuhálsarnir geta verið.“

Þrívíddarmyndir eru mikilvægur hlekkur í hönnun millidekksins en sjónarmið áhafnar hefur skipt miklu máli í ferlinu. Mynd/Klaki

Sérstakir sjóhausarar

Millidekkið á Baldvini Njálssyni er fullhlaðið nýjungum og eru þar tveir hausarar og flökunarvél frá Curio. Hausararnir eru ný tegund af sjóhausurum sem eiga að geta hentað vel fyrir mikinn fjölbreytileika tegunda að sögn Páls.

„Þá var mikið gert til að tryggja að göngurými og vinnuaðstaða væri eins góð og kostur er á. Þetta á eftir að afkasta rosalega miklu. Það er hugsað út í að fækka handtökum eins og mögulegt er þannig að menn geti beitt kröftum sínum mest þar sem þeirra er þörf á hverjum tíma. Það er snyrtiaðstaða fyrir átta í áhöfn til að snyrta flök. Það er lóðrétt frystitæki. Gólfið er úr ryðfríu stáli. Allt rafmagn er sett á bak við loftaklæðningu. Allur frágangur er rosalega flottur.“

Baldvin Njálsson kom til Keflavíkur á þriðjudag. mbl.is/Sigurður Bogi

Dælur í flutning og þvott

Um borð eru fiskidælur frá Klaka og færa þær fiskinn á þann stað sem hann á að fara en á meðan er hann umlukinn sjó. Með þessu þvæst hann vel á leiðinni og má segja að tvær flugur náist í einu höggi. Síðan eru sjö flokkunarkör með sjó eða krapa, sem geta tekið við fiski áður en hann er flakaður.

Á meðan Klaki hf. annaðist vinnsluna kom Optimar að frystingu, pakkningu og hleðslukerfinu á millidekkinu en þar er meðal annars bitaflokkari frá Marel. „Það er búið að reyna að ná í það besta af öllu,“ segir Páll.

„Það eru tveir sjálfvirkir frystar og eru pakkar fluttir sjálfvirkt inn á vöruhótel. Þar er þetta flokkað og staflað í hillur. Þegar safnað hefur verið af valinni tegund sem fyllir bretti er það keyrt sjálfvirkt inn í pökkun þar sem það er pakkað og sent niður í lest. Þetta er allt sjálfvirkt,“ bætir hann við.

Tengdar fréttir

Endurnýjun skipaflotans

Unnið hörðum höndum í nýjum Hákoni

• Ætla að smíða tvö ný fiskiskip
• Togurum fækkaði um þrjá
• „Erum hvergi nærri af baki dottin“
• Sjósettu nýjan Hákon ÞH í Póllandi

» Fleiri tengdar fréttir

Nýsköpun og tækni í sjávarútvegi

Frumkvöðlar bláa hagkerfisins kynna nýsköpun

• Hugmyndafræði Sjávarklasans víða eftirsótt
• Rétt hugarfar hafi átt áhrif á heimsvísu
• Árangur Íslands skólabókardæmi um fullnýtingu
• Vinnslur gætu framleitt eigin sótthreinsiefni úr sjó

» Fleiri tengdar fréttir