Vilja banna innflutning á norskum þorski og makríl
Setja bókamerki
Tengdar fréttir
Makrílveiðar
Samtök evrópskra útgerðarmanna (Europeche) saka norsk stjórnvöld um að misnota stöðu sína vegna óleystra Brexit-mála og eigna sér aflahlutdeildir aðildarríkja Evrópusambandsins í þorski og makríl. Í yfirlýsingu á vef sínum hvetja samtökin íbúa Evrópusambandsins til að sniðganga norskar sjávarafurðir og Evrópusambandið til að loka innri markaðnum fyrir norskum þorski og makríl.
„Brotthvarf Bretlands úr ESB hefur gjörbreytt fiskveiðistjórnuninni og pólitískri stöðu í norðausturhluta Atlantshafs. Í því skyni að nýta sér þetta ástand virðist Noregur hafa yfirgefið leið samráðs og góðs samstarfs og ákveðið einhliða að hirða með ólögmætum hætti fiskkvóta ESB. Þessi aðgerð ógnar ekki aðeins uppbyggilegu framtíðarsamstarfi við ESB heldur einnig sjálfbærni mikilvægra fiskstofna eins og makríls og þorsks. Þar sem 60% af fiskinum sem Norðmenn veiða enda á Evrópumarkaði hvetja útgerðarmenn ESB-borgara til að hætta neyslu norskra sjávarafurða,“ segir í yfirlýsingunni.
Engir samningar eru milli strandríkja um hvernig skuli skipta makrílnum en ríkin hafa öll gefið út einhliða kvóta. Hækkuðu Norðmenn og Færeyingar kvóta til sinna skipa um 55%.
Loka innri markaðnum
Því er haldið fram að þessi framganga Norðmanna hafi verið til þess fallin að hvetja önnur ríki til að fara sömu leið og Norðmenn og er sérstaklega vísað til Færeyja sem sakaðar eru um að hafa einhliða aukið sinn hlut í makrílveiðunum. „Þessi afstaða sýnir ekki aðeins augljósa fyrirlitningu gagnvart alþjóðalögum heldur einnig augljóst virðingarleysi gagnvart ESB sem samstarfsaðila og bandamanni.“
Í yfirlýsingunni er einnig að finna ákall til stofnana Evrópusambandsins um að „loka innri markaðnum fyrir þessum afurðum og fjarlægja viðskiptaívilnanir sem veittar eru norskum fiskafurðum, sérstaklega varðandi þorsk og makríl.“ Fullyrðir Europeche að þessar aðgerðir yrðu ekki aðeins „sterkt svar“ við meintum brotum Norðmanna heldur einnig mikilvægur þáttur í að vernda evrópsk fyrirtæki.
„Samkvæmt sjávarútveginum er nóg af makríl sem veiddur er af [fyrirtækjum innan] ESB, svo enginn skortur er á hráefni og þess vegna er alls engin þörf á aukaframboði á Evrópumarkað,“ segir að lokum í yfirlýsingunni.
Tengdar fréttir
Makrílveiðar
Ók á ofsahraða á móti umferð og uppi á stétt
Þetta eru hjólaframkvæmdirnar sem unnið er að
Laugavegur hjólaferðamannsins að fæðast
Níu milljónir í auglýsingar til erlendra miðla
Innviðagjald skili 30 milljörðum
Rothissa á vinnubrögðum forystu BÍ
Bregðast við vopnahléstillögu á morgun
Norskur lögreglumaður dæmdur