Þýskalandsmeistarar Bayer Leverkusen í knattspyrnu karla slá hvergi slöku við á tímabilinu og hafa enn ekki tapað leik í neinni keppni. Í gær vann liðið stórsigur á Eintracht Frankfurt, 5:1, í þýsku 1. deildinni.
Leverkusen tryggði sér þýska meistaratitilinn í fyrsta sinn í síðasta mánuði, er í undanúrslitum Evrópudeildarinnar og 2:0 yfir eftir fyrri leik sinn gegn Roma auk þess sem liðið er komið í úrslitaleik þýsku bikarkeppninnar.
Möguleikarnir á þrennu eru því mjög góðir.
Alls hefur liðið spilað 48 leiki á tímabilinu og ekki tapað einum einasta þeirra.
Í gær skoruðu Granit Xhaka, Patrik Schick, Exequiel Palacios úr vítaspyrnu, Jeremie Frimpong og Victor Boniface úr vítaspyrnu fyrir Leverkusen.