Rafíþróttaliðið Dusty er eitt sigursælasta lið landsins og hefur unnið flesta titla sem eru í boði hér á landi. Liðið á keppnislið í Counter-Strike og Valorant.
Dusty er einnig með ungmennastarf og heldur úti æfingum fyrir börn á aldrinum 12-16 ára og býður upp á námskeið í Fortnite, Valorant, Counter-Strike og Overwatch.
Þorsteinn Friðfinnsson er yfirþjálfari Dusty og einnig liðsmaður í keppnisliðinu í Counter-Strike. Hann sér um þjálfunina og setur upp æfingar samkvæmt stöðlum ECA-æfingakerfisins.
Þorsteinn segir það mikilvægasta við þjálfunina sé að skipuleggja sig vel. „Það þarf að setja markvisst niður plan, ekki bara leika sér og gera eitthvað, heldur þarf að ákveða hvað á að vera betri í hvort sem það er að skjóta, byggja eða hvað sem þarf að bæta sig í. Mæta og vera með plan.“
Tímarnir hjá Dusty skiptast upp í líkamlegar æfingar og eftir það setjast krakkarnir við tölvurnar og vinna markvisst að því að bæta sig.
Þorsteinn er nýjasti viðmælandinn í SETTÖPP og sýnir frá starfsemi Dusty. Hægt er að sjá viðtalið í heild sinni í spilaranum hér að ofan.