Mikill fengur að hafa Óla í kvennaboltanum

„Það er mikill fengur að hafa þjálfara eins og Óla í kvennaboltanum,“ sagði John Andrews, þjálfari Víkings eftir 1:0 sigur liðsins gegn Þrótti í Bestu deild kvenna í knattspyrnu í kvöld.

Vísaði hann þar til Ólafs Kristjánssonar, þjálfara Þróttar.

Frétt af mbl.is

Þróttur enn án sigurs

„Gæði leiksins voru frábær, Þróttur gaf okkur hörkuleik og við þurftum að hafa fyrir þessum sigri,“ sagði John í samtali við mbl.is eftir leik.

„Við vissum hverju við áttum von á og það raungerðist og við þurftum að standa í lappirnar og berjast, sem við gerðum og við skoruðum frábært mark,“ hélt hann áfram.

Katla Sveinbjörnsdóttir, markmaður Víkings, var aftur á bekknum í dag en hún meiddist í leik liðsins gegn Val og var ekki með í síðustu umferð. Birta Guðlaugsdóttir stóð vaktina í rammanum í dag og stóð sig vel.

„Katla er leikhæf og hún var frábær á æfingu í gær, mikil samkeppni á milli hennar og Birtu um stöðu í liðinu, tveir frábærir markverðir,“ sagði John.

Víkingur á tvo stóra útileiki framundan, fyrst Aftureldingu í bikarnum og síðan FH í Bestu deildinni. John er brattur fyrir báða.

„Ég sá seinni hálfleikinn hjá FH í leik þeirra gegn Stjörnunni í gær og þær voru frábærar en fyrst er bikarinn og það verður spennandi leikur án efa,“ sagði hann að lokum í samtali við mbl.is.

• Blogga um frétt