Þekkir þú fjallið? var samsýning Fatasöfnunar Rauða krossins, Hringrásarklasans og námsbrautar í fatahönnun við Listaháskóla Íslands á nýliðnum HönnunarMars. Sýningin var haldin í fallegu gróðurhúsi í bakgarðinum hjá Exeter-hótelinu við Tryggvagötu. 

Hugmyndin var að varpa ljósi á ofgnótt textíls og mikilvægi þess að fólk og fyrirtæki vinni í sameiningu að því að draga úr sóun og skapa hringrás textíls, náttúrunni og framtíðarkynslóðum til heilla. 

Fatasöfnun Rauða krossins og námsbraut í fatahönnun við Listaháskóla Íslands hafa síðasta áratuginn staðið að verkefninu Misbrigði. Nemendur á öðru ári hanna þrjá alklæðnaði úr notuðum, ósöluhæfum fatnaði og textíl.

Fjölmargir kíktu á sýninguna

Ungir sem aldnir lögðu leið sína á sýninguna en þar mátti sjá textílfjall eða eitt tonn af textíl sem komið hafði verið fyrir í gróðurhúsinu ásamt ljósmyndum af verkefnum nemenda í Misbrigði IX.

Með verkefninu fá nemendur tækifæri til að vinna með textíl sem til fellur, með tilheyrandi áhrifum á hönnunarferlið og fá um leið innsýn og skilning á þeim áhrifum sem fataiðnaðurinn hefur á samfélög og umhverfi.