Óli Örn Eiríksson, teymisstjóri athafnaborgarinnar á skrifstofu borgarstjóra, áréttar að samningar um bensínstöðvar frá því í júnímánuði 2022 hafi verið unnir af starfshóp sem skipaður var eftirfarandi starfsmönnum: Haraldi Sigurðssyni, á umhverfis- og skipulagssviði, Óla Jóni Hertervig, á eignaskrifstofu fjármálasviðs, og Þórhildi Lilju Ólafsdóttur, hjá embætti borgarlögmanns.
„Hvorki ég né Ívar [Örn Ívarsson, deildarstjóri lögfræðideildar á skrifstofu borgarstjóra og borgarritara] höfðum nokkra aðkomu að þessari samningagerð og getum ekki svarað fyrir samningagerðina. Við vísum á þessa aðila varðandi þau atriði,“ segir Óli Örn.
Tilefnið er frétt í Morgunblaðinu í fyrradag og fyrirspurn sem blaðið lagði fyrir Óla Örn og Ívar Örn um byggingarheimildir á lóðunum.
Fram kom í fréttinni að fjöldi íbúða sem heimilt verður að reisa á bensínstöðvalóðum í borginni væri nokkuð á reiki. Borgin hafi áætlað í desember 2022 að 700-800 íbúðir yrðu á bensínstöðvalóðum. Samkvæmt tilkynningu frá borginni síðastliðinn þriðjudag hafði hún lækkað þá tölu niður í 387-464 íbúðir.
Þá kom fram í sömu frétt að Óli Örn hefði vísað fyrirspurninni til Ívars Arnar en svar þá ekki borist um daginn.
Daginn sem fréttin birtist hafði Óli Örn samband við blaðamann og sagði misræmi í ofangreindum tölum eiga sér eðlilegar skýringar. Boðaði síðan að frekari upplýsingar myndu berast frá Ívari Erni síðar um daginn. Þær bárust hins vegar hvorki í fyrradag né í gær.
Svarið við fyrirspurninni er því enn í vinnslu hjá borginni.
Umræddar íbúðaheimildir hafa verið til umræðu í vikunni, í kjölfar umfjöllunar Kastljóss um málið, en út frá þeim verður hægt að áætla verðmæti lóðanna.