Bláa lónið verður lokað út mánudaginn 1. apríl. Er það vegna eldgossins sem hófst við Sundhnúkagígaröðina þann 16. mars, en lónið hefur staðið lokað síðan þá.
Á vef fyrirtækisins segir að gosstöðvarnar séu í öruggri fjarlægð frá Bláa lóninu. Þrátt fyrir það hafi verið tekin ákvörðun um lokun á starfsstöðvum Bláa lónsins fram á mánudag.
Haft verður samband við alla gesti sem eiga staðfestar bókanir á meðan lokuninni stendur en gestir geta líka breytt bókun eða afbókað á heimasíðu lónsins.
„Við höldum áfram að fylgjast með stöðu mála í nánu samráði fyrir yfirvöld og fylgjum ráðleggingum og fyrirmælum þeirra í hvívetna,“ segir í tilkynningunni.