Kristín Björk Ómarsdóttir, slökkviliðsmaður í Grindavík, hefur staðið vaktina undanfarnar vikur í Grindavík og séð íbúum sem pakka niður búslóðum sínum fyrir kössum, plasti, límbandi og síðast en ekki síst Morgunblaðinu.
Blaðamaður og ljósmyndari Morgunblaðsins komu við hjá Kristínu í vikunni.
„Þetta bara gengur rosa vel. Fólk er í misjöfnu ástandi þegar það kemur. Það brosir í gegnum tárin,“ segir Kristín spurð hvernig gengið hafi að afhenda þessar nauðsynjar þegar búslóð er pakkað niður í kassa og flutt á brott.
Kristín er þó ekki bara í því hlutverki að afhenda fólki allt sem þarf til að pakka heldur bregður hún sér í hlutverk sáluhjálpara þegar þörf er á.
„Jájá, það fær alveg knús ef það þarf knús. Maður reynir að stappa stálinu í fólk ef þarf,“ segir Kristín.
Hún hefur starfað sem slökkviliðsmaður í Grindavík undanfarin þrettán til fjórtán ár.
Nánari umfjöllun er að finna í Morgunblaðinu í gær, laugardag.