Konan sem handtekin var harkalega á Laugavegi 7. júlí síðastliðinn var í dag dæmd í 30 daga skilorðsbundið fangelsi fyrir að hrækja á lögreglumanninn sem handtók hana. Handtakan leiddi til þess að lögreglumaðurinn var ákærður fyrir líkamsárás og brot í opinberu starfi.
Konan játaði skýlaust brot sitt en hún hefur ekki áður gerst sek um brot svo kunnugt sé.
Í dóminum segir að dómstólar líti það alvarlegum augum þegar brotið sé gegn valdsstjórninni. Þá segir að atvikin sem áttu sér stað eftir að konan hrækti á lögreglumanninn, þ.e. handtakan, hafi ekki áhrif við ákvörðun refsingar.