Erlent | mbl | 21.1.2024 | 20:35 | Uppfært 22.1.2024 13:05

Dregur framboðið til baka og styður Trump

Ron DeSantis hefur dregið framboð sitt til baka. AFP/Giorgio Viera

Ron DeSantis, ríkisstjóri Flórída, hefur dregið framboð sitt til baka í baráttunni um forsetatilnefningu Repúblikanaflokksins. Hann lýsir sömuleiðis yfir stuðningi við Donald Trump, fyrrverandi Bandaríkjaforseta.

Þetta tilkynnti hann nú fyrir skömmu.

“Success is not final, failure is not fatal: it is the courage to continue that counts.”

- Winston Churchill pic.twitter.com/ECoR8YeiMm
— Ron DeSantis (@RonDeSantis) January 21, 2024

Nikki Haley síðasti mótframbjóðandi Trump

Ron DeSantis var um tíma talinn líklegastur af öllum mótframbjóðendum til að sigra Donald Trump en kosningabarátta hans náði aldrei flugi. Í síðustu viku var fyrsta kosningin í forvali Repúblikana og var það í Iowa-ríki. Hann fékk rétt rúmlega 21% atkvæði en Donald Trump rúmlega 50%.

Nú stendur aðeins einn mótframbjóðandi eftir gegn Donald Trump og það er fyrrverandi ríkisstjóri Suður-Karólínu, Nikki Haley. Kosið verður á þriðjudag í New Hampshire en þar mælist Haley með nokkuð fylgi, þó mælist Trump með þokkalega mikið forskot á hana.

Donald Trump mælist með yfirburðarfylgi á landsvísu meðal Repúblikana.