Sagðist ekkert hafa að gera og var rekinn

Talsmaður dómstóls í New York-ríki var rekinn í síðustu viku eftir að haft var eftir honum í blaðagrein að hann hefði lítið að gera í vinnunni og mætti nánast aldrei þrátt fyrir að þiggja 166 þúsund dollara í laun á ári, um 17 milljónir króna.

David Bookstaver starfaði í mörg ár við dómstólinn eða allt frá árinu 1996. Hann hringdi óvart í blaðamann New York Post um daginn. Sá svaraði ekki í símann svo talhólf hans tók við símtalinu. Bookstaver heyrðist þá ræða við félaga sinn um að hann ætlaði að láta sig hverfa úr vinnunni þann daginn. „Ég er ekki að gera neitt. Ég mæti varla í vinnuna,“ heyrðist hann segja. Blaðamaðurinn skrifaði svo frétt upp úr símtalinu og birti á vef New York Post.

Bookstaver er 58 ára og hafði ráðgert að setjast í helgan stein í október. Af því verður ekki því honum hefur nú verið sagt upp störfum. 

Í frétt AP-fréttastofunnar um málið segir að starf Bookstaver hafi verið fjölbreytt, allt frá því að útskýra fyrir fólki hvernig málmleitartæki dómshússins virkuðu og til þess að lægja öldur fjölmiðlabáls í tengslum við málefni dómstólsins. 

En í febrúar í fyrra var hann sviptur mörgum starfsskyldum sínum er Lucian Chalfen var ráðinn við hlið hans. Hann sagði við félaga sinn, í samtalinu sem tekið var upp í talhólfi blaðamannsins, að hann væri enn með góð laun, en hefði engum skyldum að gegna. „Ég bauð sjálfur upp á þetta,“ sagði hann við félagann. „Þegar þú ert kjaftaglaður, skilurðu, þá verður það þér að falli á endanum.“

• Blogga um frétt