Áhöfnin komst frá borði áður en Lómur sökk

Grænlenski rækjutogarinn Lómur sökk aðfararnótt sunnudags skammt frá Sisimiut og slapp áhöfnin með skrekkinn. Grænlandsdeild danska hersins, Arktisk Kommando, hrósar áhöfninni fyrir að bregðast rétt við þegar togarinn lenti í vandræðum.

Um tíu mínútur fyrir miðnætti á laugardagskvöldi tilkynnti áhöfnin í gegnum Aasiaat-útvarpskerfið að togarinn væri að taka á sig sjó suðvestur af Sisimiut og var óskað eftir neyðaraðstoð, að því er fram kemur í umfjöllun Sermitsiaq. Var þá kallað út varðskipið Hvítabjörninn (dk. Hvidbjørnen) ásamt léttbát lögreglunnar Ilik.

Hvidbjørnen. Ljósmynd/Landhelgisgæslan

Um klukkutíma eftir neyðarkallið, fimm mínútur fyrir eitt um nótt, berast viðbragðsaðilum skilaboð um að áhöfnin sé að yfirgefa skipið og skömmu seinna að allir tíu í áhöfn séu komnir í björgunarbáta.

Aðeins nokkrar mínútur eftir að áhöfnin yfirgaf togarann mætti Ilik, bátur lögreglunnar, á vettvang og tókst að koma áhöfninni allri í öruggt skjól. Kom Ilik til Sisimiut um hálf þrjú um nótt með áhöfnina um borð og björgunarbátana í togi.

Lómur sökk um klukkan fjögur.

Royal Greenland gerir Lóm út og sagði Merete Lindstrøm, samskiptastjóri félagsins, er Sermitsiaq ræddi við hana að mikill léttir væri að allt hafi gengið vel. „Við reynum að útvega áfallahjálp eins hratt og mögulegt er,“ sagði hún.

Gamall Hafnfirðingur

Lómur var smíðaður af Hjørungavaag Verksted í Noregi árið 1988 fyrir grænlenska útgerð og fékk nafnið Qaqqaliaq. Var hann 41 metrar að lengd, 10 metra breiður og 810 brúttótonn.

Febrúar árið 1997 var togarinn keyptur til Íslands og fékk hann þá nafnið Lómur HF-177 og var gerður út af útgerðarfélagi í Hafnarfirði með sama nafn. Togarinn var seldur til Eistlands 1999 og fékk þá nafnið Baltic Lomur og var gerður út frá Tallinn. Þaðan var hann seldur aftur til Grænlands 2003.

• Blogga um frétt