Fjórðungsmót vestlenskra hestamanna hófst í gær í blíðskaparveðri í Borgarnesi. Mótið fór vel af stað en forkeppni er lokið í B-flokki gæðinga, ungmenna, barna og unglinga.
Í B-flokki er sýnt fet, hægt tölt, brokk, stökk og greitt tölt.
Á sunnudaginn lauk Íslandsmótinu i hestaíþróttum á Hólum í Hjaltadal, einhverjir knapar sem kepptu þar létu ekki líða langt á milli stríða og voru strax mættir aftur í hnakk í Borgarnesi. Íslandsmótið er íþróttamót en fjórðungsmótið er gæðingamót, er því um ólíkar áherslur að ræða og einkunnir ekki samanburðarhæfar. Í einfölduðu máli þá er einblínt á hæfileika hestsins á gæðingamótum en á íþróttamótum einblínt á tæknina, samspil knapa og hests.
Eftir forkeppni í opnum flokki er Daníel Jónsson efstur með einkunnina 8,81 á hestinum Adrían frá Garðshorni á Þelamörk. Efst í ungmennaflokki er Freydís Þóra Bergsdóttir sem situr Ösp frá Narfastöðum, með einkunnina 8,47.
Barnaflokkur og unglingaflokkur voru ákaflega sterkir í forkeppni. Guðmar Hólm Ísólfsson Líndal á hestinum Freyði frá Leysingjastöðum er efstur inn í úrslit í unglingaflokki með einkunnina 8,60 sem hefði jafnvel nægt til að koma honum í úrslit í opnum flokki.
Í barnaflokki er Hjördís Halla Þórarinsdóttir efst á hestinum Flipa frá Bergsstöðum með einkunnina 8,44.
Alendis TV sér um beina útsendingu frá mótinu.