Einar Þorsteinn Ólafsson, landsliðsmaður í handbolta, er í stóru hlutverki hjá Fredericia í Danmörku en liðið tryggði sér sæti í undanúrslitum um danska meistaratitilinn með sannfærandi sigri á GOG um síðustu helgi.
„Við áttum frábæran leik á móti GOG í úrslitaleik um að komast í undanúrslitin. Við erum í frábærri stöðu núna. Lífið úti er rosalega huggulegt. Maður er kominn í smá rútínu, umhverfið er gott og liðsfélagarnir eru góðir. Maður er einbeittur fyrir næstu leiki,“ sagði hann við mbl.is.
Fredercia fór einnig í undanúrslit í fyrra og endaði að lokum í þriðja sæti. Kom liðið gríðarlega á óvart.
„Það var ekki búist við þessu af okkur í fyrra, en það er meiri pressa á okkur í ár að gera það sama og jafnvel fara enn lengra. Við setjum pressuna á okkur sjálfir,“ sagði hann. Guðmundur Guðmundsson þjálfar Fredericia.
„Gummi býst við miklu frá manni og þannig vill maður hafa þjálfarann. Hann dregur það besta úr manni og hann er góður í því.“
Einar Þorsteinn lék á sínu fyrsta stórmóti á EM í byrjun árs og hann er þakklátur fyrir traustið sem Snorri Steinn Guðjónsson hefur sýnt honum. „Þetta getur horfið á 0,1 sekúndu og það er mikilvægt að njóta. Þetta er mikill heiður fyrir mig.“
Einar er uppalinn hjá Val og er sáttur við að uppeldisfélagið sé komið í úrslit Evrópubikarsins. „Ég er búinn að vera að horfa á alla þessa leiki og ég er mjög ánægður. Vonandi fara þeir alla leið og taka þetta,“ sagði Einar.