Forsetabróðirinn og íþróttastjarnan, Patrekur Jóhannesson (bróðir Guðna Th. Jóhannessonar forseta Íslands) og Rakel Anna Guðnadóttir hafa sett smekklegt einbýlishús sitt á sölu. Um er að ræða 278 fm einbýli sem stendur við Brekkugötu í Garðabæ. Húsið var reist 2021 og þannig séð nýtt af nálinni eins og sagt er.
Í eldhúsinu eru vandaðar innréttingar sem voru sérsmíðaðar hjá Hyrnunni á Akureyri. Þar mætir hnota gráum sprautulökkuðum hurðum og kampavínslituðum marmara. Milli stofu og eldhúss er veggur úr sjónsteypu sem setur hlutina í annað samhengi. Hægt er að opna innréttinguna hressilega upp á gátt en bak við hurðirnar leynist bæði kaffistöð og bökunarstöð. Sem er eitt af því sem eldhúsglöðu fólki dreymir um.
Í heild sinni er heimilið snoturt. Það er búið fallegum húsgögnum sem passa við innréttingarnar.