Aðstoðar lögreglunnar á höfuðborgarsvæðinu var óskað um miðja liðna nótt, þar sem vart hafði orðið við mannaferðir á endurvinnslustöð.
Lögregla var einnig kölluð til vegna viðskiptavina sem voru til vandræða í verslun, í umdæmi lögreglustöðvarinnar sem sinnir verkefnum í Kópavogi og Breiðholti.
Bifreið var þar einnig stöðvuð en ökumaður hennar er grunaður um akstur undir áhrifum fíkniefna. Þá reyndist hann vera án gildra ökuréttinda.
Í umdæmi Hafnarfjarðar og Garðabæjar var bifreið einnig stöðvuð en viðkomandi ökumaður er grunaður um akstur undir áhrifum áfengis. Þá reyndist hann þegar sviptur ökuréttindum vegna fyrri afskipta lögreglu.
Annars staðar á höfuðborgarsvæðinu voru fjórir ökumenn stöðvaðir, grunaðir um of hraðan akstur.