Útflutningsverðmæti ferskra sjávarafurða var í apríl síðastliðnum 38% hærra en í sama mánuði í fyrra og stóðu þær fyrir 27% útflutningsverðmætum sjávarafurða í heild. Hefur hlutfall ferskra afurða aldrei verið meira. Jafnframt hafa útflutningsverðmæti ferskra afurða aldrei verið meiri á fyrstu fjórum mánuðum ársins.
Vakin er athygli á þessu í nýjustu greiningu Radarsins.
Útflutningsverðmæti sjávarafurða í apríl var 28,5 milljarðar króna samkvæmt bráðabirgðatölum Hagstofu Íslands. Um er að ræða 2% aukningu frá sama mánuði á síðasta ári. Í greiningu Radarsins er bent á að aukningin sé þó um 1% í erlendri mynt þar sem gengi krónunnar var 1% hærri í apríl síðastliðnum en í sama mánuði í fyrra.
Ferskar afurðir skiluðu 7,7 milljörðum króna í apríl sem er veruleg aukning frá sama mánuði á síðasta ári þegar fengust 5,6 milljarðar.
Einnig varð veruleg aukning í útflutningsverðmætum saltaðra og þurrkaðra afurða og skiluðu þær 5,1 milljarði króna, sem er 27% meira en fékkst fyrir þennan afurðaflokk í apríl á síðasta ári.
Aukning varð einnig í útflutningsverðmætum „annarra sjávarafurða“ en þó aðeins minni, 5%. Í greiningu Radarsins er bent á að undir þennan afurðaflokk heyra meðal annars loðnuhrogn.
„Þar sem um fyrstu bráðabirgðatölur Hagstofunnar ræðir í apríl liggja ekki fyrir upplýsingar um verðmæti niður á einstaka fisktegundir í mánuðinum. Gera má þó ráð fyrir að nokkur útflutningur sé á loðnuhrognum í apríl frá síðustu loðnuvertíð, líkt og verið hefur undanfarna mánuði.“
Mikill samdráttur varð í útflutningi heilfrysts fisks í apríl og drógust útflutningsverðmæti þess flokks saman um 35% milli ára.
„Þann samdrátt má vafalaust að stærstum hluta rekja til loðnubrests, enda var þó nokkur útflutningur á heilfrystri loðnu í apríl í fyrra,“ segir á Radarnum.
Í apríl síðastliðnum voru útflutningsverðmæti frystra flaka 11% minni en í sama mánuði á síðasta ári auk þess sem útflutningsverðmæti fiskismjöls dróst saman um 8% og lýsis um 10%. Mesti samdrátturinn var í rækju og voru útflutningsverðmæti afurðarinnar 61% minni í apríl á þessu ári en á síðasta ári.
Samanlögð útflutningsverðmæti sjávarafurða á fyrstu fjórum mánuðum ársins eru tæplega 111 milljarðar króna sem er rúmlega 3% minna en fékkst á sama tímabili í fyrra.
„Vart þarf nefna að þennan samdrátt má alfarið skrifa á loðnubrest. Það endurspeglast ágætlega í þeim mikla samdrætti sem er í útflutningsverðmæti fiskimjöls (40%) og heilfrysts fisks (33%) á milli ára, en í báðum flokkum voru loðnuafurðir, þ.e. loðnumjöl og heilfryst loðna, fyrirferðarmiklar í fyrra,“ segir í greiningunni.
Nokkur aukning er þó í sumum afurðaflokkum og eykst útflutningsverðmæti lýsis um 16% milli ára og ferskra afurða um 14%. „Í þeim tilvikum hafa verðmætin í raun aldrei verið meiri á fyrsta ársþriðjungi og nú í ár.“