Orkla ASA hefur keypt allt hlutafé í Nóa-Síríusi hf. Orkla keypti 20% hlut í fyrirtækinu árið 2019 og í samkomulagi þar um var opnað fyrir þann möguleika að fyrirtækið myndi kaupa sælgætisframleiðandann íslenska að fullu.
Í tengslum við þessi viðskipti hefur Finnur Geirsson, forstjóri Nóa-Síríusar, ákveðið að láta af störfum eftir 31 ár í stóli forstjóra. Finnur mun þó samkvæmt tilkynningu halda áfram sem forstjóri félagsins til 1. ágúst þegar Lasse Ruud-Hansen tekur við stöðunni en hann hefur víðtæka reynslu innan matvælaiðnaðarins og hefur gegnt trúnaðarstörfum á vettvangi Orkla.
Fjármálaráðgjöf Deloitte hafði umsjón með söluferlinu og var ráðgefandi seljanda í því. Kaupin eru sögð háð samþykki Samkeppniseftirlitsins.
„Á þessum tímamótum er ég sérstaklega stoltur af því að hafa, ásamt framúrskarandi samstarfsfólki, byggt upp þetta frábæra fyrirtæki og vörumerki sem Nói-Síríus er. Þegar eitt stærsta fyrirtæki Norðurlandanna á þessu sviði sýnir fyrirtækinu jafn mikinn áhuga og raun ber vitni, fyrst sem minnihluthafi og í kjölfarið með núverandi samkomulagi, er það skýr vitnisburður um einstakan árangur. Við erum jafnframt ánægð með kaupandann, sem er öflugur aðili með víðtæka þekkingu á starfsemi af þessu tagi, og teljum við að Nói-Síríus verði í góðum höndum með Orkla. Fyrir þeim vakir að hlúa að okkar ágætu vörumerkjum sem hafa unnið sér hylli á löngum ferli fyrirtækisins,“ segir Finnur í tilkynningu.
Orkla er leiðandi fyrirtæki á neytendavörumarkaði á Norðurlöndum, í Eystrasaltsríkjunum og á völdum mörkuðum í Mið-Evrópu og á Indlandi. Orkla er skráð á hlutabréfamarkað í Noregi og var velta þess árið 2020 um 47 milljarðar norskra króna. Starfsmenn félagsins eru 21 þúsund talsins.