Reitir fasteignafélag lauk í gær hlutafjárútboði þar sem félagið safnaði samtals 5,16 milljörðum með útgáfu á 120 milljón nýjum hlutum á genginu 43 krónur á hlut. Bárust samtals áskriftir upp á 11,8 milljarða og var eftirspurnin því rúmlega tvöföld miðað við framboð.
Í útboðinu bárust áskriftir fjárfesta fyrir alls 11.813.039.464 kr. eða 274.721.849 nýjum hlutum. Í forgangsréttarhluta útboðsins bárust áskriftir fyrir samtals 10.059.157.657 kr. eða 233.933.899 hlutum og í almennum hluta útboðsins bárust áskriftir fyrir samtals 1.753.881.807 kr. eða 40.787.949 nýjum hlutum.
Í samræmi við reglur útboðsins var alls 120.000.000 nýjum hlutum úthlutað til forgangsréttarhafa en þar er um að ræða áskrift að öllum þeim nýju hlutum sem boðnir voru í útboðinu. Samkvæmt því kemur ekki til úthlutunar nýrra hluta til þeirra fjárfesta sem skráðu áskrift í almennum hluta útboðsins.
Útboðið hófst á þriðjudaginn og lauk í gær, en það var Arctica Finance hf. sem var umsjónaraðili útboðsins en Íslandsbanki var félaginu einnig til ráðgjafar.