Cintamani flytur úr Bankastræti

Verslun íslenska fataframleiðandans Cintamani í Bankastræti verður lokað um mánaðamótin og hyggst verslunin flytja sig ofar, og á Laugaveg. Þetta staðfesti Dagný Guðmundsdóttir, framkvæmdastjóri verslunarinnar, við Morgunblaðið en hún vildi ekki gefa það upp að svo stöddu hvert nákvæmt heimilisfang hinnar nýju staðsetningar væri.

„Húsnæðið er allt of stórt og húsaleigan allt of há,“ segir Dagný aðspurð hvers vegna fyrirtækið tók ákvörðunina um að flytja úr Bankastræti en núna er rýmingarsala í gangi og allt á 50% afslætti í búðinni. Segir hún nýja húsnæðið minna og hentugra.

„Við erum að opna minni búð og afslátturinn er til þess gerður að auðvelda okkur flutninga,“ segir Dagný.

Cintamani tapaði 127 milljónum króna á rekstrarárinu 2017 og segir Dagný að eftir að hún tók við á ný sem framkvæmdastjóri hafi hún þurft að hagræða vel í rekstri félagsins.

„Síðustu tvö ár hafa ekki verið nægilega góð hjá okkur,“ segir Dagný.