Reka íbúafélög hjá íbúðafélagi

Eignaumsjón hf. og Bjarg íbúðafélag hafa gert með sér samkomulag um að Eignaumsjón annist rekstrarumsjón íbúafélaga sem starfrækt verða í fjölbýlishúsum á vegum Bjargs. Fyrstu tvö íbúafélögin, fyrir Móaveg 2-12 í Grafarvogi og Asparskóga 12-16 á Akranesi, eru tekin til starfa.

Í tilkynningu segir að íbúafélög Bjargs líkist í raun almennum húsfélögum. Hvert íbúafélag verður sjálfstætt félag leigutaka í viðkomandi húsi eða húsum, sem kýs sér stjórn og verður formaður stjórnar jafnframt tengiliður íbúafélagsins við Bjarg.

Íbúafélögin í húsum Bjargs annast samkvæmt tilkynningunni daglegan rekstur sameignar og búnaðar, m.a. kaup á raforku, hita, ræstingu, sorphirðu, umhirðu lóðar og bílastæða, ásamt öðru sem íbúarnir ákveða. Eignaumsjón aðstoðar við undirbúning og stofnun íbúafélaganna, ásamt því að annast rekstrarumsjón íbúafélaganna, s.s. utanumhald um fjárreiður, samskipti við íbúa um málefni félaga og framkvæmd félagsfunda.