„14 ár er góður tími. Þegar maður finnur að ástríðan er að minnka er betra að hætta á meðan allt er í lagi. Það var kominn tími til að breyta til og takast á við nýjar áskoranir,“ segir Þórarinn Ævarsson, framkvæmdastjóri IKEA á Íslandi, um starfslokin hjá IKEA eftir 14 ár í starfi. Hann lætur af störfum næstu mánaðamót.
„Í hreinskilni sagt veit ég það ekki. Ég er með alls konar hugmyndir en það er ekkert í hendi. Mér þykir líklegt að ég fari að vinna eitthvað í kringum matvæli. Ég hef gert það alla ævi og tel mig vera ansi góðan í því. Ef ég ætti að veðja myndi ég skjóta á það en hvað veit ég?“ segir hann, spurður hvað hann ætli að fást við eftir þetta.
Í tilkynningu sem IKEA sendi frá sér í gær kemur meðal annars fram að eigendur IKEA á Íslandi „hafa jafnframt áform um að starfa með honum á öðrum vettvangi“.
Þórarinn bendir á að þeir þekkist vel enda hafa þeir unnið saman hátt í 30 ár. „Ég er ekki að hætta í illu og því er ekki loku fyrir það skotið að við finnum eitthvað saman,“ segir hann.
Áður en hann tók við sem framkvæmdastjóri IKEA starfaði hann í 12 ár hjá Dominos hjá sömu eigendum og eiga IKEA.
Næsta mál á dagskrá sé að fara í snemmbúið sumarfrí í næsta mánuði sem hann hlakkar talsvert til. Hann reiknar með að í haust verði hann búinn að finna stefnuna á ný mið.