Íslensk verðbréf hafa undirritað samning um kaup á Viðskiptahúsinu, en samningurinn er gerður í kjölfar áreiðanleikakannana sem nú er lokið. Fyrirvari er í samningnum um samþykki eftirlitsaðila og hluthafafundar Íslenskra verðbréfa sem haldinn verður 20. desember.
Íslensk verðbréf eru eignastýringarfyrirtæki með höfuðstöðvar á Akureyri og 18 starfsmenn. Var fyrirtækið stofnað árið 1987 og þjónustar bæði einstaklinga og fagfjárfesta.
Viðskiptahúsið hefur starfað frá 1999 og sérhæft sig í ráðgjöf til fyrirtækja í sjávarútvegi og tengdum greinum. Starfsmenn fyrirtækisins eru átta talsins.
Haft er eftir Sigurði Atla Jónssyni, stjórnarformanni Íslenskra verðbréfa, að þetta sé fyrsta skrefið að nýju sérhæfðu fjármálafyrirtæki sem byggi á grunni í eignastýringu og atvinnulífssérhæfingu.