Launum stjórnenda sett skynsamleg mörk

„Við vitum öll að umræða um mjög há laun stjórnenda hefur áhrif,“ sagði Eyjólfur Árni Rafnsson, formaður Samtaka atvinnulífsins, á ársfundi samtakanna sem var haldinn í Hörpu í dag.

Frétt af mbl.is

Ársfundur SA í beinni útsendingu

Hann sagði að tilhneigingin hafi stundum verið sú að bíða eftir að slík umræða hjaðni og líta í framhaldinu svo á að málinu sé lokið. Það sé hins vegar ekki raunin.

„Á tímum nútímafjölmiðlunar og samfélagsmiðla gleymist ekkert. Umræðan hefur neikvæð áhrif, ekki einungis á viðkomandi fyrirtæki heldur atvinnulífið í heild,“ sagði hann.

Eyjólfur bætti við að á hinum Norðurlöndunum sé það ekki liðið að forstjórar og æðstu stjórnendur hækki umfram almenna launaþróun.

Hann sagði mikilvægt að fyrirtæki taki ábyrgð sína alvarlega gagnvart lögum og reglum og starfi í góðri sátt við umhverfi sitt og samfélag.

Einnig tók hann fram að það sé sérstaklega mikilvægt að fyrirtæki sem eru skráð á almennan hlutabréfamarkað móti starfskjarastefnu fyrir stjórnendur sína og setji launum og aukagreiðslum skynsamleg mörk sem samræmist íslenskum veruleika.

• Blogga um frétt