Skiptum á þrotabúi Icemine ehf. lauk í september en engar eignir fundust upp í kröfurnar sem námu tugum milljóna króna. Félagið var stofnað í kringum rekstur gagnavers sem var leigt til svokallaðrar bitcoin-námuvinnslu.
Hluthafar félagsins eru tveir Svisslendingar; Giorgio Massarotto með 90% og Andreas Fink með 10%.
Í umfjöllun DV í apríl 2016 kemur fram að Massarotto hafi keypt fasteignina Klettatröð af Þróunarfélagi Keflavíkurflugvallar, Kadeco, í júlí 2014 gegnum félag sitt Icemine. Kaupverðið nam 130 milljónum og var greitt við afhendingu. Þá á Massarotto að hafa samið við Orkusöluna og HS veitur um kaup og flutning á þremur megavöttum af raforku.
Massarotto réðst í breytingar á húsnæðinu í þeim tilgangi að breyta því í gagnaver. Samkvæmt heimildum DV var gagnaverið leigt út til fyrirtækja í Sviss og á Ítalíu sem stunda bitcoin-námuvinnslu en hún felur í sér að nota ofurtölvur til þess að búa til nýjar bitcoin-myntir.
Samtals voru kröfurnar tæpar 43 milljónir og samkvæmt upplýsingum mbl.is voru helstu kröfuhafar Orkusalan og tollstjóri.