Skypark, Trampólíngarður Íslands, verður opnaður á morgun að Urðarhvarfi 14 í Kópavogi. Fram kemur í fréttatilkynningu að þar verði boðið upp á stærsta trampólínsvæði á landinu auk sérstakra leikherbergja og herbergja fyrir barnaafmæli og aðra fagnaðarfundi.
„Skypark er hugsað jafnt fyrir fjörkálfa á öllum aldri, og lögð er áhersla á létt og skemmtilegt andrúmsloft, jafnt fyrir börn sem fullorðna. Þá verður kaffihús með þráðlausu interneti. Staðinn prýða stór málverk eftir listamennina Helenu Hanni og Vahur Agar, þar sem myndefni er sótt í íslenskar hetjur frá ýmsum tímum og ævintýri sem börn þekkja,“ segir ennfremur.
Skypark, Trampólíngarður Íslands verður opinn virka daga 11-22 og um helgar frá 10-22.