Með 910 milljarða í skattaskjólum

Alls hafa 320 ríkustu fjölskyldur Danmerkur komið 60 milljörðum danskra króna, sem svarar til 910 milljarða íslenskra króna, fyrir í erlendum skattaskjólum. 

Fyrst var greint frá þessu í fréttum danska ríkisútvarpsins en fjallað er um þetta í fréttum allra fjölmiðla í Danmörku í dag.

Um er að ræða upplýsingar sem fengust um reikninga danskra milljarðamæringa í HSBC-bankanum í Sviss en um er að ræða hluta af gögnum sem lekið var til fjölmiðla fyrir tveimur árum.

Niels Johannesen, hagfræðiprófessor við Kaupmannahafnarháskóla, segir í samtali við DR að það séu einkum ríkustu fjölskyldur Danmerkur sem hafa falið fé sitt í skattaskjólum en hann hefur unnið að rannsókn á gögnunum ásamt starfssystkinum við háskóla í Noregi og Bandaríkjunum.

Hann segir að rannsóknin leiði í ljós að 320 ríkustu fjölskyldur Danmerkur hafi falið um fjórðung af eignum sínum í skattaskjólum.

Frétt DR

• 1 blogg um fréttina

Bloggað um fréttina

• Ómar Geirsson: Hið frjálsa flæði fjármagns.