Fer vel af stað á Ion

Veiði fer mjög vel af stað á svokölluðu Ion-svæði á Þingvöllum samkvæmt upplýsingum frá Stefáni Kristjánssyni leiðsögumanni. Veiði hófst á mánudaginn og var fyrsti dagurinn heldur rólegur en síðan hafi verið góð veiði og með þeirri betri sem hann muni eftir svo snemma á tímabilinu.

Um er að ræða veiðisvæði skammt frá Nesjavöllum sem skiptast í tvö tveggja stanga veiðisvæði, Þorsteinsvík og Ölfusvatnsós.  

Stefán sagði að þrátt fyrir hálfgert skítaveður og mjög hvassa austanátt hefðu 52 fiskar komið á land í dag á stangirnar fjórar og þar af 42 úr Þorsteinsvíkinni. Veiðin í Ölfusvatnsósi hefði verið fremur róleg miðað við oft áður. Skýringin væri sú að haft væri í ósnum sem gerði það að verkum að áin leitar út í vatnið beggja vegna. Við þær aðstæður væri veiðin oftast minni en þegar áin kæmi í einni bunu og af meiri krafti út í vatnið. Þetta kæmi þó til með að lagast næst þegar áin færi í flóð í næstu rigningartíð. 

Stærstu fiskarnir væru upp í 82 cm, en mikið væri af 74 til 76 cm fiskum sem væru um og yfir 5 kíló að þyngd. 

Fallegur urriði á land úr Þorsteinsvík fyrr í dag. ion

• Blogga um frétt

Seinustu hundraðkallar sumarsins