Nýr formaður Skotvís

Aðalfundur Skotveiðifélags Íslands (Skotvís) var haldinn í gær og var Áki Ármann Jónsson kosinn nýr formaður félagsins. Áki Ármann er líffræðingur að mennt og var veiðistjóri frá 1998 til 2003 og síðar sviðsstjóri hjá Umhverfisstofnun 2003-2017.

Indriði R. Grétarsson, fyrrverandi formaður, gaf ekki kost á sér til endurkjörs eftir 6 ára stjórnarsetu, þar af 1 ár sem formaður. Í nýrri stjórn sitja nú, auk Áka Ármanns, Jón Víðir Hauksson sem kjörinn var í embætti varaformanns, Jón Þór Víglundsson, Nanna Traustadóttir, Einar Haraldsson, Emil Birgir Hallgrímsson og Sigurbjörn Snjólfsson.

Fram kemur í fréttatilkynningu frá Skotvís að nýrrar stjórnar bíði fjölmörg krefjandi verkefni, þar sem stofnun Miðhálendisþjóðgarðs ber hvað hæst, breytingar á veiðistjórnun og vopnalögum. Nýkjörin stjórn félagsins mun halda áfram að leggja áherslu á hagsmunamál skotveiðimanna í góðri samvinnu við önnur útivistar- og náttúruverndarsamtök og stjórnvöld.

Nýr formaður, Áki Ármann, sagði í lok aðalfundarins að það væri ánægjulegt að sjá að félagsmönnum fjölgaði á síðasta ári og muni ný stjórn halda áfram að byggja upp innviði félagsins á fertugasta starfsári þess sem verði öllum skotveiðimönnum landsins til heilla.

• Blogga um frétt

Seinustu hundraðkallar sumarsins