Kaká, fyrrverandi landsliðsmaður Brasilíu í knattspyrnu, segir að hinn brasilíski Ronaldo njóti ekki þeirrar virðingar sem hann á skilið í heimalandi sínu.
Ronaldo, sem er 46 ára gamall, var stórkostlegur knattspyrnumaður á sínum tíma en hann varð tvívegis heimsmeistari með Brasilíu; árin 1994 og 2002.
Hann lék 98 A-landsleiki fyrir Brasilíu og skoraði í þeim 62 mörk en hann var útnefndur besti knattspyrnumaður heims og hlaut Gullknöttinn eftirsótta árin 1997 og 2002.
„Það er sérstakt að segja þetta en margir Brasilíumenn styðja ekki alltaf Brasilíu,“ sagði Kaká en hann er einn af sérfræðingum beIn Sports í kringum heimsmeistaramótið í Katar sem nú stendur yfir.
„Þegar að maður sér Ronaldo hérna í Katar þá eru allir með stjörnur í augunum. Í Brasilíu er hann bara feitur maður að ganga niður götuna.
Auðvitað elska hann margir í Brasilíu, ég geri það líka, en hann nýtur einfaldlega mun meiri virðingar utan Brasilíu, en innan hennar, sem er mjög sérstakt,“ bætti Kaká við.