Aðdáandi Messi framdi sjálfsvíg

Hinn 30 ára gamli Dinu Alex frá Indlandi, ákafur aðdáandi argentínsku knattspyrnustjörnunnar Lionel Messi, framdi sjálfsvíg eftir 3:0 tap Argentínumanna gegn Króötum á HM í knattspyrnu á föstudagskvöldið.

Lík hans fannst í Meenachil ánni í Indlandi í morgun en síðast sást til Alex horfa á leik Argentínu og Króatíu. Hann skildi eftir sig miða í herbergi sínu sem á stóð; Það er ekkert eftir fyrir mig að sjá í þessum heim. Ég er að fara. Það er enginn ábyrgur fyrir dauða mínum.“

Alex var mikill fótboltaáhugamaður og átti Lionel Messi hug hans allan.

Messi og samherjar hans í argentínska landsliðinu hafa valdið gríðarlegum vonbrigðum á HM. Þeir byrjuðu á því að gera 1:1 jafntefli á móti Íslendingum og steinlágu 3:0 fyrir Króötum. Þeir mæta Nígeríumönnum í lokaumferð riðlakeppninnar á þriðjudaginn. Argentínumenn halda enn í von um að komast áfram en til þess að það verði verða þeir að vinna Nígeríumenn og treysta á að Íslendingar vinni ekki sigur á Króötum.

• Blogga um frétt