Íslenska karlalandsliðið í handknattleik, skipað leikmönnum 19 ára og yngri, tapaði fyrir Egyptalandi í átta liða úrslitum á HM U19 í Skopje í Norður-Makedóníu í dag. Leiknum lauk með 35:31-sigri Egypta sem fara áfram í undanúrslit keppninnar.
Staðan í hálfleik var 21:14, Egyptalandi í vil, og tókst íslenska liðinu ekki að brúa það bil að ráði í seinni hálfleik. Haukur Þrastarson og Tumi Steinn Rúnarsson voru markahæstir í íslenska liðinu með átta mörk hvor.
Íslenska liðið mun leika um 5.-8. sætið á laugardaginn en ekki er enn þá ljóst hverjir mótherjar íslenska liðsins verða í leiknum.