Skulduðum öllum betri leik

„Þetta var mikið betra hjá okkur að þessu sinni. Segja má að við höfum mætt til leiks,“ sagði Sigurbjörg Jóhannsdóttir, fyrirliði Fram, eftir að liðið jafnaði metin í rimmunni við Val í úrslitum Íslandsmót kvenna í handknattleik í dag með sex marka sigri, 28:22, á heimavelli.

„Viðureignin var engu að síður jöfn nánast frá upphafi en í alla staði var þetta mikið betri leikur af okkar hálfu en fyrsta viðureignin á heimavelli Vals á þriðjudaginn.  Við skulduðum okkur og stuðningsmönnum mikið betri leik en þá auk þess sem sigur var lífsnauðsynlegur fyrir framhaldið í þessari leikjaröð,“ sagði Sigurbjörg.

„Við þurftum virkilega að hafa fyrir þessum sigri. Það er ekkert gefið gegn Valsliðinu og ég reikna með að næstu leikir verði á þessum nótum, jafnir og spennandi,“ sagði Sigurbjörg Jóhannsdóttir, fyrirliði Fram.

• Blogga um frétt