Atvinnukylfingurinn Guðmundur Ágúst Kristjánsson komst ekki í gegnum niðurskurðinn á Investec South African-mótinu á Evrópumótaröðinni í golfi en hann lauk leik á öðrum hring fyrir skömmu. Leikið er í Jóhannesarborg í Suður-Afríku.
Guðmundur Ágúst, sem varð á dögunum annar íslenski karlkylfingurinn til að tryggja sér fullan þátttökurétt á Evrópumótaröðinni, á eftir Birgi Leifi Hafþórssyni, lék á 72 höggum eða á pari Blair Atholl-vallarins á fyrsta hring á fimmtudag.
Honum tókst að leika sex holur á öðrum hring í gær áður en leik var frestað vegna veðurs. Á þeim tímapunkti var hann í fínum málum á tveimur höggum undir pari, réttum megin við áætlaða niðurskurðarlínu.
Leik var fram haldið í morgun og hóf Guðmundur daginn ágætlega með pörum á fyrstu þremur holunum. Hann tapaði þá tveimur höggum í röð og var kominn í aðeins verri stöðu.
Guðmundur svaraði vel með tveimur fuglum á næstu fimm holum og var aftur kominn réttum megin við áætlaða niðurskurðarlínu þegar hann átti aðeins tvær holur óleiknar á öðrum hring.
Hann fékk par á 17. braut en skolla á þeirri 18. og féll niður fyrir áætlaða niðurskurðarlínu. Allir kylfingarnir hafa lokið leik og því má slá því föstu að Guðmundur Ágúst sé úr leik.
Guðmundur Ágúst er ofarlega á biðlista fyrir Alfred Dunhill-meistaramótið í Suður-Afríku í næstu viku en er með öruggt sæti á Mauritius Open, sem hefst 15. desember næstkomandi.