Ásta Kristinsdóttir, landsliðskona í hópfimleikum, bar sigur úr býtum í svokallaðri Faceoff-keppni í hópfimleikum Västerås í Svíþjóð um síðustu helgi.
Ásta varð Evrópumeistari í hópfimleikum með Íslandi á síðasta ári og hlaut silfurverðlaun með liðinu í haust. Ásta hlaut 10.000 sænskar krónur fyrir sigurinn, tæplega 150.000 krónur. Þá fékk hún 18 kílóa bikar sömuleiðis.
Íslenska fimleikakonan framkvæmdi þrefalt heljarstökk á áhaldinu, en hún er á meðal bestu fimleikakvenna landsins. Var hún valin í lið mótsins á EM í Lúxemborg fyrr á árinu.
Í ár var í fyrsta skipti keppt í kvennaflokki en ásamt Ástu keppti æfingafélagi hennar úr Stjörnunni Helena Clausen. Í karlakeppninni átti Ísland tvo keppendur, þá Júlían Mána K. Rakelarson og Ágúst Óliver Erlingsson einnig úr Stjörnunni.
Í umfjöllun fimleikasambands Íslands um mótið er Faceoff-keppni lýst svona:
Faceoff-keppnin hefur verið haldin í Svíþjóð síðan 2014, þar sem besta fimleikafólk í heimi kemur saman og einkennist keppnin af ljósasýningu og dúndrandi bassa tónlist. Tilgangurinn er að sýna hvað mannslíkaminn getur og hvernig fimleikar geta líka litið út.