Kraftlyftingakonan Fanney Hauksdóttir fékk á laugardaginn silfurverðlaun í klassískri bekkpressu í -63 kg flokki á Evrópumótinu sem fram fór í Merignac í Frakklandi.
Í klassískum kraftlyftingum má ekki notast við neinn hjálparbúnað sem er leyfilegur í kraftlyftingum.
Í seríunni lyfti Fanney 107,5 kg - 110 kg og 112,5 kg. Allar lyfturnar voru gildar og tryggði lokalyftan henni silfrið. Þetta var jöfnun á besta árangri hennar á alþjóðlegu móti og var aðeins 0,5 kg frá Íslandsmeti hennar
Hin ungverska Palagyi Zsanett vann gullið en hún lyfti 117,5 kg.
Í október mun Fanney síðan keppa í bekkpressu á EM í kraftlyftingum en þá mega keppendur notast við hjálparbúnað.