Lætur forráðamenn Barcelona heyra það

Gerard Pique knattspyrnumaður hjá Barcelona lætur forráðamenn félagsins heyra það vegna þeirrar stöðu sem komin er upp hjá Lionel Messi. Reyndi Messi að yfirgefa Barcelona í sumar en án árangurs. Mun Messi þess í stað róa á önnur mið eftir leiktíðina.

Pique skrifaði sjálfur undir nýjan þriggja ára samning við félagið í vikunni, en hann er allt annað en sáttur með stöðu liðsfélaga síns frá Argentínu.

„Ég spyr sjálfan mig hvernig stendur á því að besti leikmaður sögunnar vaknar einn daginn og sendir fax, því honum finnst ekki hlustað á sig? Hvað er í gangi? Messi á allt gott skilið. Það ætti að byggja nýjan völl og nefna hann í höfuðið á Messi. Ég skil þetta ekki,“ sagði Pique við Goal og hélt áfram.

„Félagið biður leikmenn um að lækka í launum svo það geti eytt peningum í eitthvað all annað. Það særir mig. Það er vont að sjá að maðurinn sem stendur á bak við allt þetta er enn að vinna hjá félaginu,“ sagði Pique og átti þá við Josep Maria Bartomeu forseta félagsins.

• Blogga um frétt