Max Verstappen á Red Bull vann í dag sinn fyrsta ráspól á ferlinum í formúlu-1 er hann varð hlutskarpastur í tímatöku ungverska kappakstursins í Hungaroring rétt í þessu.
Um leið varð Verstappen eitthundraðasti ökumaðurinn til að vinna ráspól í formúlu-1. Er kappaksturinn sá 93. á ferli hans.
Hollendingurinn ungi háði jafna rimmu við ökumenn Mercedes Benz og lauk henni með því að Valtteri Bottas varð annar en aðeins 18 þúsundustu úr sekúndu á eftir. Lewis Hamilton varð þriðji.
Charles Leclerc og Sebastian Vettel hjá Ferrari höfðu litið í slaginn um fremstu rásröðina að gera en þeir voru hálfri sekúndu lengur með hringinn en Verstappen.
Í sætum sex til tíu - í þessari röð - urðu Pierre Gasly á Red Bull, Lando Norris og Carlos Sainz á McLaren, Romain Grosjean á Haas og Kimi Räikkönen á Alfa Romeo, en hann var 1,5 sekúndum lengur með hringinn en Verstappen.