Íþróttir | Formúla 1 | mbl | 24.6.2018 | 15:44 | Uppfært 16:49

Hamilton óviðráðanlegur í 65. sigri

Mynd 1 af 16 Lewis Hamilton fagnar sigrinum í Le Castellet. Til vinstri er Max Verstappen og til hægri Kimi Räikkönen. AFP

Mynd 2 af 16 Vélvirki hjá Force India sýnir depurð eftir samstuð og árekstra á fyrsta hring, en þá féll annar ökumaður liðsins úr leik. AFP

Mynd 3 af 16 Frá fyrstu metrunum eftir ræsingu í Le Castellet. AFP

Mynd 4 af 16 Frá árekstri Bottas og Vettels í fyrstu beygju í Le Castellet. Lengst til hægri sleppur Hamilton framhjá. AFP

Mynd 5 af 16 Rétt eftir ræsingu í Le Castellet. Verstappen (t.v.) komst þar upp í annað sætið og Carlos Sainz (t.h.) í það þriðja. AFP

Mynd 6 af 16 Lewis Hamilton ekur sigri hrósandi yfir markið í Le Castellet. AFP

Mynd 7 af 16 Kimi Räikkönen kláraði kappaksturinn í Le Castellet með öflugum hætti og vann sig upp á verðlaunapall. AFP

Mynd 8 af 16 Max Verstappen á ferð í Le Castellet í dag. AFP

Mynd 9 af 16 Keppni Frakkans Pierre Gasly á Toro Rosso á heimavelli sínum lauk eftir nokkur hundruð metra. AFP

Mynd 10 af 16 Öryggisbíllinn var sendur út í brautina vegna óhappa á fyrsta hring. AFP

Mynd 11 af 16 Listflugsveit franska hersins, Patrouille de France, heiðruðu keppendur og gesti með lágflugi yfir brautina í Le Castellet. AFP

Mynd 12 af 16 Vörubíll ók heiðurshring í Le Castellet með ökumenn á pallinum. Fylgdi mótorhjólasveit herlögreglunnar þeim hringinn. AFP

Mynd 13 af 16 Vörubíll ók heiðurshring í Le Castellet með ökumenn á pallinum. Fylgdi mótorhjólasveit herlögreglunnar þeim hringinn. AFP

Mynd 14 af 16 Efnt var til hjólakeppni fyrir tímatökuna í Le Castellet og hér er sigurvegarinn, Bretinnn Simon Yates, á ferð. AFP

Mynd 15 af 16 Vel fer á með Lewis Hamilton (t.v.) og Sebastian Vettel eftir tímatökuna í Le Castellet. AFP

Mynd 16 af 16 Valtteri Bottas virðir eitthvað athyglisvert fyrir sér eftir tímatökuna í Le Castellet. Væntanlega er það eitthvað á Ferraribílnum sem hann skoðar. AFP

„Gleðilegan sunnudag,“ sagði Lewis Hamilton í talstöðinni eftir að hafa ekið fyrstur yfir endamark franska kappakstursins í Le Castellet. Var þetta 65. sigur hans á ferlinum í samtals 20 mismunandi brautum.

Þetta er í fyrsta sinn í áratug sem formúlumót er haldið í Frakklandi

Hamilton hóf keppni af ráspól og var öðrum ökumönnum óviðráðanlegur. Var honum aldrei ógnað. Naut hann þess þó ef til vill að helstu keppinautarnir, liðsfélaginn Valtteri Bottas og Sebastian Vettel á Ferrari lentu í samstuði á fyrsta hring. Vegna skemmda urðu þeir að fara inn að bílskúr til að skipta um framvæng (Vettel) og dekk. Féllu þeir niður í síðustu sæti og urðu að vinna sig fram á við drjúgan tíma keppninnar.

Á endanum stóðu Max Verstappen á Red Bull og Kimi Räikkönen á Ferrari við hlið Hamiltons á verðlaunapallinum. Fjórði varð Daniel Ricciardo á Red Bull, fimmti Vettel, sjötti Kevin Magnussen á Haas, sjöundi Bottas áttundi Carlos Sainz á Renault og tvö síðustu stigasætin féllu í skaut Nico Hülkenberg á Renault og Charles Leclerc á Sauber.

Sainz var í sjötta sæti nær alla keppnina en varð fyrir vélarbilun er fjórir hringir voru eftir og missti tvo keppendur fram úr sér. Hálfri mínútu síðar hefðu þeir ekki getað tekið fram úr því sýndaröryggisbíll var kallaður út í brautina eftir að framdekk sprakk með látum á Williamsbíl Lance Stroll.

Mikið var um samstuð á árekstra á fyrsta hring kappakstursins. Féllu tveir heimamenn úr leik, Esteban Ocon á Force India og Pierre Gasly á Toro Rosso. Nokkrið aðrir urðu fyrir tjóni og þurftu að fara inn að bílskúr til viðgerða.

Vettel var úrskurðaður sekur um samstuð þeirra Bottas svo undarlegt sem það hljómar því hann átti enga undankomuleið eftir að Bottas þveraði fyrir Vettel og lokaði á hann. Hlaut hann 5 sekúndna stoppvíti og sömu refsingu fékk Frakkinn Romain Grosjean á Haas fyrir akstursbrot.

Hamilton aftur í forystu

Með sigrinum, þeim þriðja í röð, endurheimti Hamilton forystu í keppninni um titil ökumanna en fyrir mótið var Vettel með eins stigs forystu. Frá Le Castellet fer Hamilton hins vegar með 14 stiga forystu, 145:131. Í þriðja sæti er Ricciardo með 96 stig, fjórði Bottas með 92 og Räikkönen 83.