Ætla að koma sterkari til baka

Zlatan sem gekk til liðs við Manchester United frá PSG fyrir síðasta keppnistímabil skoraði 28 í öllum keppnum. Zlatan skoraði meðal annars í leiknum um Samfélagsskjöldinn og þegar Manchester United tryggði sér sigur í enska bikarnum.

Endurhæfingin hefur gengið vel hjá Zlatan og Manchester United ákvað að framlengja samning sinn við þennan 35 ára gamla sænska um eitt ár. Zlatan kveðst sjálfur fullviss um að hann muni ná fyrri styrk og jafnvel gott betur þegar hann hefur hrist af sér meiðslin.

„Mér líður vel og ég nálgast mitt fyrra form með hverjum deginum sem líður. Ég hef æft alla daga síðan ég fór í aðgerðina á hnénu. Það þýðir ekki að setja tærnar upp í loftið og taka þessu sem fríi,“ sagði Zlatan í samtali við Skysports.

„Þetta er ný áskorun og reynir á mig andlega. Ég er með gott hugarfar og er einbeittur á það verkefni að ná fullum styrk á nýjan leik. Þegar ég tek mér eitthvað fyrir hendur þá fer ég alla leið og það er ekkert sem getur stöðvað mig,“ sagði Zlatan um endurhæfinguna.

„Ég set stefnuna á að vera klár fljótlega eftir áramót. Ég hef trú á því að þegar ég kem aftur inn á völlinn þá verði ég öflugri en ég var á síðustu leiktíð. Ég mun verða betri en ég hef áður verið og þið getið farið að ímynda ykkur hvernig það verður,“ sagði Zlatan um endurkomuna.